15.03. 2016.HII NI TAARIFA YA HABARI KUTOKA WAPO REDIO FM.MSOMAJI NI…………KWANZA NI MUHTASARI WAKE.

.RAIS JOHN MAGUFULI HII LEO AMEWAAPISHA WAKUU WA MIKOA WAPYA ALIOWATEUA HIVI KARIBUNI NA KUWATAKA WAKUU WA MIKOA HAO WAPYA KUHAKIKISHA VIJANA WANAFANYA KAZI NA KUACHA UZEMBE.

. WIZARA YA NISHATI NA MADINI IMETOA TAMKO LA SERIKALI LA  UGUNDUZI MKUBWA WA GAS KATIKA BONDE LA MTO RUVU MKOANI PWANI.

.WABUNGE NCHINI MYANMAR HII LEO WAMEMCHAGUA MPAMBE WA KARIBU NA RAFIKI WA MUDA MREFU WA MPIGANIA DEMOKRASIA  AUNG SAN SUU KYI KUWA RAIS WA KWANZA WA KIRAIA NCHINI HUMO BAADA YA MIONGO MITANO.

.WAMAREKANI KATIKA MAJIMBO MATANO MAKUU WANAJIANDAA KUPIGA KURA LEO KATIKA KILE KINACHOTARAJIWA KUWA KINYANG'ANYIRO KIKUBWA CHA WAGOMBEA WA URAIS AMBAPO DONALD TRUMP ANALENGA KUIIMARISHA NAFASI YAKE YA KUTAFUTA TIKETI YA REPUBLICAN.

HABARI KAMILI.
DAR ES SALAAM,

Rais John Magufuli hii leo amewaapisha wakuu wa mikoa wapya aliowateua hivi karibuni na kuwataka wakuu wa mikoa hao wapya kuhakikisha vijana wanafanya kazi na kuacha uzembe.
 

Rais Magufuli amewataka kuhakikisha kuwa hakuna vijana watakaokwenda kucheza pool table asubuhi na badala yake vijana hao wanatakiwa kufanya kazi kweli kweli hata kwa kulazimishwa.

Akizungumza kuhusu suala la wafanyakazi hewa kwenye Halmashauri zote nchini Rais Magufuli amesema  amewapa siku 15 wakuu wapya wa mikoa kuhakikisha hakuna wafanyakazi hewa katika Halmashauri zote nchini.

Wizara ya Mawasiliano, Uchukuzi na Ujenzi kwa kushirikiana na Mamlaka ya Mawasiliano Tanzania TCRA imesema katika kuadhimisha siku ya Haki ya watumiaji wa mawasiliano Duniani imewataka watumiaji wa mawasiliano kupeleka kero zao.

Akizunguma katika warsha ya siku ya haki ya watumiaji wa mawasiliano Duniani Naibu katibu mkuu wizara ya mawasiliano ,Uchukuzi na Ujenzi Dkt. Mary Sasabo amesema lengo la siku hiyo ni kutoa elimu, kuandaa vipepelushi elekezi vya matumizi ya mawasiliano.

Kwaupande wake Mkurugenzi Mkuu wa Mamlaka ya mawasiliano Tanzania TCRA Dkt. Ally Simba amesema wizi wa simu za mkononi uko mbioni kufutika hapa nchini kutoka na kuwa simu yoyote itakayo ibiwa itafungiwa haraka

Wizara ya nishati na madini imetoa tamko la serikali la  ugunduzi mkubwa wa gas katika bonde la mto Ruvu mkoani Pwani.

Akizungumza na waandishi wa habari jijini Dar es salaam Waziri wa Nishati na Madinip Prof.Sospeter Mhongo amesema ugunduzi huo umefanywa na Kampuni ya Doxel na TPDC ambapo zaidi ya futi za ujazo trilioni 2.17 wamegunduliwa katika eneo hilo.

Aidha ameongeza kuwa kituo hicho kunaitwa MAMBA KOFI 1 na utafiti zaidi unaendelea ambapo hadi kufikia leo Tanzania imegundua zaidi ya futi za ujazo trilioni 10.17 za nchi kavu na futi za ujazo trilioni 47.08 za baharini jumla ikiwa ni trilioni 57.

NA HIZI NI  HABARI ZA KIMATAIFA KUTOKA WAPO REDIO FM.

Wabunge nchini myanmar hii leo wamemchagua mpambe wa karibu na rafiki wa muda mrefu wa mpigania demokrasia  Aung San Suu Kyi kuwa rais wa kwanza wa kiraia nchini humo baada ya miongo mitano.

Tin chau, mwenye umri wa miaka 69, ameelezea kuchaguliwa kwake katika wadhifa huo mkuu kuwa ni ushindi wa suu kyi huku wabunge wakishangilia baada ya chau kutangazwa kuwa mshindi kwa kupata kura 360 kati ya 652 zilizopigwa.

Rais huyo mpya ataapishwa aprili mosi, kuchukua nafasi ya utawala wa miaka mitano wa rais anayeoondoka madarakani Thein Sein aliyeungwa mkono na jeshi na kuliweka taifa hilo kwenye mkondo sahihi wa kuondokana na utawala wa moja kwa moja wa kijeshi.

Wizara ya ulinzi ya urusi imesema linaziandoa baadhi ya ndege zake za mizigo na kivita zilizoko katika kituo cha jeshi la anga la urusi nchini syria na kuzirejesha nyumbani kufuatia amri iliyotolewa na rais Vladmir Putin.

Taarifa hiyo ya wizara ya ulinzi imekuja siku moja baada ya Putin kutangaza kuondoka kwa idadi kubwa ya majeshi ya urusi nchini Syria, hatua ambayo inakwenda sanjari na kuanza kwa mazungumzo ya amani ya Syria jijini Geneva.

Kuanza kwa mazungumzo hayo hapo jana kulimpa Putin fursa nzuri ya kutangaza kumalizika kwa operesheni ya urusi ya miezi mitano na nusu ya mashambulizi ya angani ambayo yameliwezesha jeshi la syria kuyakomboa maeneo muhimu na kujiimarisha kabla ya mazungumzo ya amani.

Rais wa Umoja wa Ulaya Donald Tusk, leo anatarajiwa kuwa na mazungumzo nchini Cyprus na Uturuki kama sehemu ya juhudi za kukamilisha masharti ya mpango wa Umoja wa Ulaya na Uturuki wa kudhibiti mmiminiko wa wahamiaji barani Ulaya.

Habari zinasema rais huyo wa Baraza la Ulaya, ambaye ataandaa mkutano mpya wa kilele kati ya Umoja wa Ulaya na Uturuki, anakutana leo na Rais wa Cyprus Nicos Anastasiades mjini Nicosia na kusafiri kwenda Ankara kufanya mashauriano na Waziri Mkuu wa Uturuki Ahmet Davutolu.

Uturuki na Umoja wa Ulaya zimekubaliana kuhusu mpango mpya wa muda ili kujaribu kupunguza mmininiko wa wakimbizi na wahamiaji Ulaya ambapo Umoja wa Ulaya umekubali kumpa makazi mapya mkimbizi wa Syria kutoka katika kambi zilizoko Uturuki.

Wamarekani katika majimbo matano makuu wanajiandaa kupiga kura leo katika kile kinachotarajiwa kuwa kinyang'anyiro kikubwa cha wagombea wa urais ambapo Donald Trump analenga kuiimarisha nafasi yake ya kutafuta tiketi ya Republican.

Katika siku iliyopewa kichwa cha "Jumanne Kabambe ya pili" kinyang'anyiro cha uchaguzi wa awali, kabla ya uchaguzi wa Novemba kitawapeleka wagombea wa Democratic na Republican katika majimbo ya Florida, Illinois, Missouri, North Carolina na Ohio.

Matokeo ya Florida, Illinois na Ohio yatakuwa muhimu kwa vyama vyote viwili kutokana na idadi kubwa ya wajumbe wanaopiga kura katika kila jimbo ambapo mgombea Wademocrat Hillary Clinton anatarajiwa kuimarisha uongozi wake dhidi ya mpinzani wake Bernie Sanders.

MWISHO WA TAARIFA YA HABARI KUTOKA WAPO RADIO FM 98.1KWA TAARIFA NYINGINE YA HABARI UNGANA NASI SAA MOJA KAMILI JIONI.